HOE SÊ MENS DANKIE?

2020 was vir niemand maklik nie. Die uitdagings, die verliese, die teleurstellings en die kommer was iets wat almal van ons in die gesig gestaar het. En alhoewel hierdie jaar beslis nie sal deurgaan as een van my beste jare nie, kan ek steeds bladsye skryf oor hoe dankbaar ek is.

Het jy geweet daar is ‘n verband tussen dankbaarheid en geluk?

Wanneer jy dankbaarheidsgewoontes aanleer verander jou brein. Die beloningsisteem in jou brein word geaktiveer (dis lekker om dankbaar te voel) en dit reguleer jou stresrespons (die streshormoon kortisol word onderdruk).

Dankbare kinders slaap beter, is meer optimisties en empaties, kan beter aandag behou en is minder angstig en depressief.

My persoonlike reis om dankbaarheid ‘n gewoonte te maak het begin toe my kinders klein was en ons in London gebly het. Daar was dae dat die alleenheid en grys en koue weer my onder gekry het. En toe verskyn Ann Voskamp se boek One Thousands Gifts, en die saadjie word geplant wat my lewe verander het.

Ek het ‘n dankbaarheidsjoernaal begin en my kinders uitgedaag om dit saam met my te doen.

Soggens by die ontbyttafel het ons alles waarvoor ons dankbaar was, neergeskryf. Die water wat uit

ons krane gekom het, die stoele waarop ons kon sit, ‘n warm huis en kos om te eet.

Dis merkwaardig wat ‘n verskil hierdie gewoonte aan ‘n mens maak. In my huis het dit nie net my my denke, my gemoed en my siel verander nie, dit het ook die kinders s’n verander. Skielik was daar minder meltdowns, minder teëpratery, minder skermutselings en meer glimlagte en drukkies en beter verhoudings.

Dit het goed gegaan vir ‘n paar jaar, maar toe word die kinders groter en die lewe besiger …

Maar nou is dit Desember 2020. Ek dink dis tyd om my dankbaarheidsjoernaal uit te haal, af te stof en die gewoonte weer in te oefen.

“Dankie tog die jaar is verby. Dankie tog vir nog ‘n jaar wat ek uit U hand kry!”

Kweek dankbaarheidsgewoontes binne JOU huis:

  • – Vra aan die ontbyttafel: “Waarna sien jy uit vandag?”
  • – Gebruik aandetes om te gesels: “Wat was die lekkerste ding wat vandag gebeur het?”
  • – Maak ‘n dankbaarheidsboom waaraan jy dankbaarheidsnotas kan hang.
  • – Hou ‘n “kla-vry” dag.
  • – Gebruik albasters, sê waarvoor jy dankbaar is en gooi dit in ‘n houer. Dit is bevredigend om te sien hoe vol die bottel mettertyd word.

Liefde,

Lizanne

Deel op
Deel op
Deel op

Lewer Kommentaar