STYL EN GEBOORTE

Eendag, nie-so-lank-gelede-nie, was hoëhakskoene dalk ‘n daaglikse deel van jou lewe. Jou borste was net bedoel vir mooi bra’s en afleiding vir jou man se oë, né? Nou, met jou nuwe bondel vreugde in jou arms, is hakkies waarskynlik nie eers meer ‘n deel van jou nuwe realiteit nie – jy bly sommer heel dag in jou pantoffels. Jou borste word nou net ingespan vir borsvoedbra’s en -voeding. Jy is in “survival mode”, want al jou aandag gaan mos nou aan jou nuwe baba.

Al’s het verander. Jy kan nie meer dieselfde klere of skoene aantrek as vantevore nie, want gaan dit werk of pas? Is jy nog dieselfde vrou as voordat jy geboorte gegee het? Die antwoord is Ja en Nee wat jou styl en klere betref. Jou stylpersoonlikheid is deel van jou menswees, dit verander nie sommer nie, jy moet dit net aanpas by jou nuwe leefstyl, maand-vir-maand en jaar-vir-jaar.

Kom ons begin met ‘n paar wenke wat jy kan toepas net voor en na geboorte:

  • Voor geboorte, gebruik die tyd om al jou “grooming” in orde te kry. Gaan vir ‘n brow shaping, skeer jou beenhare, verf jou toonnaels. Jy gaan sukkel om by dit uit te kom as die baba eers hier is.
  • ‘n Mens is nogal ongemaklik aan die einde van jou swangerskap en voel nie noodwendig mooi nie, maar moet nooit die krag onderskat van ‘n bietjie moeite met jou grimering, hare of uitrusting nie. Kry een of twee items (‘n rok, ‘n serp, ‘n mooi kleur lipstiffie) wat jy kan aantrek of aanwend om jou te help om nog steeds mooi te voel. Jy verdien al die mooi-voel wat jy kan kry, dis jou reg!
  • Kry ‘n mooi pakkie pajamas om aan te trek in die hospitaal (of waar ook al jy gaan geboorte skenk). ‘n Knopies-pyjamabloes is lekker vir borsvoed, en jy gaan sommer al klaar beter voel in iets waarvan jy hou. Kry sommer vir manlief om jou te bederf met ‘n nuwe stel pantoffels ook.
  • Maak seker jou grimeersakkie bevat ‘n lekker BB cream, bronzer en lip & cheek stain. Tyd vir jouself gaan jy vir ‘n rukkie nie baie van hê nie, so jou skoonheidsroetine moet ook aanpas. Produkte moet min wees, maar tog effektief.
  • Kry Dry Shampoo vir jou hare – jy gaan nie lus wees vir hare was as jy dalk eerder kan slaap nie. So as jy jou hare kan deurtrek met nog ‘n ekstra dag, hoekom nie?
  • Kry vir jou ‘n paar gemaklike uitrustings wat jy kan dra na geboorte, voor jy geboorte gee. Jy gaan’waarskynlik ‘n bietjie deurmekaar voel oor jou styl na geboorte, so jy gaan dalk nie die ou items wat jy altyd aangetrek het weer dadelik wil gebruik nie.
  • Tuis: Lekker “lounge wear” is gemaklike drag wat nie pyjamas is nie. Dis meer stylvol, so jy sal nie so slonserig voel soos wanneer jy heel dag in jou pj’s rondloop nie.
  • Uitgaan: Wanneer jy presies uitgaan na geboorte sal van vrou tot vrou verskil, maar jy gaan soek vir klere wat gemaklik is, in los snitte wat jou ook maklik toelaat om te borsvoed. Vir die somer sal ‘n mooi linnerok met knopies voor, saam met ‘n gemaklike sandaal of sneaker, jou gemaklik en stylvol laat voel waneer jy uitgaan. Kies ‘n ligte kleur soos wit, of ‘n donker kleur soos navy, want ‘n medium kleur sal makliker wys as jou borste per ongeluk lek.

Moenie in die eerste paar weke te hard wees op jouself oor jou styl en voorkoms nie. Vat eers tyd om gewoond te raak aan jou nuwe leefstyl. Sodra jy meer “ingesettle” voel, kan jy mettertyd na ‘n nuwe weergawe van jou ou self beweeg. Daai weergawe mag mos dalk selfs weer eendag hakkies dra! Intussen kan jy lekker stylvol wees in minimalistiese gemak.

Geniet hierdie tyd, want dit gaan tog so vinnig verby!

Liefde,

Caris

Deel op
Deel op
Deel op

Lewer Kommentaar