HOU VAS, PAPPA!

As daar nou een ding is wat ek nooit sal vergeet van die tyd toe ek in kraamsale gewerk het nie, is dit die benoude uitdrukkings op die amper-pa’s se gesigte. Amper hulpeloos, verlore en op-die-nippertjie gesigte. Dit is asof iemand vir die arme man ‘n vuurwerk met ‘n brandende lont in die hand stop en sê: “Hou hieraan vas asof jou lewe daarvan afhang, Boeta, want hierdie gaan ‘n show wees …”  

Hoe verduidelik ‘n mens die geboorteproses en alles wat daarmee saamgaan aan ‘n pa? Daar is honderde boeke en deesdae (grafiese!) videos van alles en nog wat. ‘n Mens kan handboeke oor die onderwerp skryf, maar die enigste werklike leerskool is eerstehandse ervaring.

Ek het altyd maar die pa so uit die hoek van my oog dopgehou. Sodra ek ‘n kleurverandering in die gesig sien, dan moet ‘n verpleegster nader staan, want dan is dit sulke tyd. (Oorleef hulle stadium een, skep ons asem en hou moed vir wanneer hulle bloed en plasenta sien.)

Ek het later besef dit is beter om vir pa’s ‘n paar dinge vooraf te noem:

1. Kraamsale is nie stemmige plekke nie. Dit gaan rof daar. Vind ‘n plek langs jou vrou en beweeg net as jou vrou of die personeel jou vra om te beweeg. Dit is die één plek waar jy op aandag staan. Vir jou eie veiligheid beweeg jy net so ver soos jou arm jou toelaat.

2. Dit is ‘n bloederige storie. Dit wat op die TV uitgebeeld word, is om sensitiewe kykers te beskerm. Maar jy hoef nie te kyk nie.

3. Baba’s lyk glad nie by geboorte soos hulle vier dae later gaan lyk nie. Moenie skrik nie.

4. Die wit, vetterige stof op jou baba (vernix) is vir beskerming en dit gaan later weg.

5. Die nageboorte lyk dalk grillerig, maar dit is mees amazing verbinding tussen ma en baba. Wees maar geduldig: die nageboorte kan soms ‘n tydjie neem om uit te kom.

6. ‘n Pa mag huil. Probeer dalk die snot beperk, maar laat gerus die trane rol. Die kraamsaal is immers seker een van die mees intiemste plekke waar julle saam gaan wees.

7. Moet aan niks raak wat groen is nie. Dit is steriel. (As jy ‘n knorrige en onsmaaklike verpleegster wil sien, dan vat jy aan ‘n steriele doek.)

8. ‘n Ma wat sopas geboorte geskenk het, is seer en moeg. Los die kamera en foon vir ‘n oomblik, en geniet net die wonderlike oomblik saam met jou nuwe gesin.

Die geboorte van ‘n kind is ‘n pragtige oomblik. Die instrumente, suiers, pype, klemme en lappe, not so much. Maar ‘n paar maande later gaan jy nie die kraamsaal onthou nie, net die presiese oomblik toe jy die eerste keer jou baba hoor huil. En dít is al wat saak maak.

Liefde en sterkte

Dr Owen

Deel op
Deel op
Deel op

Lewer Kommentaar