VOLKLEUR

Hoe ouer ons word, hoe losser sit ons velle. Dis net hoe dit is, mos – biologie. Gelukkig maak die plooie ook meer spasie vir ons lywe, soos dit hoort. Want só kan ons ook stelselmatig in onsself in groei, om te word wie ons bestem was om te wees, mettertyd. En dít is niks minder as genade nie.

Toe ek op skool was, was daar dae waarop ek nie altyd gevoel het asof ek die reg het om te wees wie ek is nie. Want sien, as ‘n mens in jou tienerjare is, is ‘n bietjie verwardheid oor identiteit mos die algemene norm – dis soort van die punt. Die ‘probleem’ was dat ek daai fase se bus heel gemis het: Ek was reeds die Juanli wat ek vandag is, tot ‘n groot mate, lank voordat die mense rondom my gereed was om my daarvoor te waardeer. Ek was ‘n “ou siel”, sê my ma. Ek het vroeg hierdie vel ingegroei.

En ek is nogal gekarnuffel vir hierdie sekerheid, moet ek sê. My selfvertroue – die wete dat ek reeds weet wie ek is – het my nou nie juis populêr gemaak nie. Inteendeel! Ek was ‘weird’ en té volwasse en “oud voor my tyd” en ‘n snob met ‘n piepklein vriendekring, en dit was soms meer as wat ek kon hanteer. Maar vandag is ek dankbaar dat ek op skool anders was – dat ek uitgestaan het en só kon leer om myself lief te hê langs die pad. Dankie tog. As ek nou vir tiener-Juanli kon ontmoet, sou ek graag vir haar ‘n paar lesse wou leer.

Sy sou nie noodwendig geluister het nie – sy was baie skepties oor grootmense wat hulself slim hou – maar ek weet dit sou ongetwyfeld insink. Hopelik. Ek sou haar wou leer om op te hou inkrimp as dit moeilik raak. Om haar andersheid aan te trek soos erekleure en haar talente en gawes meer hardop te deel. False humility is overrated, sal ek sê. Jy skuld niemand ‘nederigheid’ as dit uit ‘n plek van vrees kom nie. Ek weet wat selfvertroue al in my lewe beteken het – die vertroue in myself en my inherente waarde.

Ek weet ook hoe dit voel om te wonder of jy jouself met iets kan vertrou en te twyfel in my vermoëns … Dit is daarom een van my grootste dryfvere in die lewe om ander te help om hulself en hul selfvertroue te ontdek, om hul stemme te gebruik en hul stories te vertel. En dis presies waarvoor ek dus soms hierdie hoekie van die internet gaan gebruik!

As ek jou vandag van een ding kan oortuig, hoop ek dis dit:
Jy het waarde, Naguil. Basuin dit uit! Wees wie jy is, in volkleur.

Jy is presies wie jy nodig het.

Gaan wees haar.

Liefde
Juanli
Deel op
Deel op
Deel op

1 thought on “VOLKLEUR”

Lewer Kommentaar