HET JY ‘N GELDIGE TESTAMENT?

Ou Testament vs Nuwe Testament … en ons praat nou nie hier van die Bybel nie …

Die belangrikste ding om te doen nadat jou eerste baba gebore is, is om jou testament op te dateer en seker te maak dit is geldig.

Jy kan dit selfs voor die geboorte ook doen om seker te maak alle scenario’s en risiko’s is gedek.

Daar is drie redes hiervoor:

1. Indien jy nie ’n geldige testament het nie en dan tot sterwe kom, sterf jy “intestaat”. Dit beteken dat jou wense vir erfgoed nie kan realiseer nie omdat spesifieke wetgewing, Die Wet op Intestate Erfopvolging, dan van toepassing is. Hierdie wet bepaal dan hoe jou bates verdeel moet word tussen erfgename.

2. Indien jy ’n geldige testament het, maar dit bepaal nie uitdruklik dat jou minderjarige kinders se erfporsie aan ’n testamentere of bestaande trust bemaak word nie, dan val daardie erfporsie in die staatskas tot die dag wat hulle meerderjarig is. Die administratiewe proses om die erfporsie later van tyd op te eis, kan langdradig wees, die opbrengs daarop waarskynlik minder as wat dit andersins belê sou word en jy is ook nie noodwendig seker of die erfporsie veilig is nie.

3. ’n Testament is ook belangrik om ’n voog (of voogde) vir jou kinders te benoem indien albei ouers sou afsterf. ’n Testament en die dood is die laaste goed waaraan ‘n mens dink wanneer jy opgewonde is oor die geboorte van ’n baba, maar dit is juis belangrik om hieraan aandag te gee om seker te maak dat jou kinders ten alle tye versorg en geborge is. ***Hierdie is nie formele regsadvies nie en moet ook nie so geïnterpreteer word nie. Indien jy spesifieke advies verlang, kontak ‘n gekwalifiseerde persoon om jou hiermee te help.

Deel op
Deel op
Deel op

Lewer Kommentaar