SLAAP IS VIR DIE VOËLS

Die euforie van ‘n nuwe baba word sommer vinnig oorskadu wanneer die gebrek aan slaap inskop. ‘Sleep deprivation’ is nie verniet ‘n vorm van marteling nie … Die euforie is steeds dáár, dis net: Ek het na drie weke gewéns dat daar iewers ‘n “On/Off”-knoppie kon wees soos my behoefte aan slaap dit nodig gehad het. Na ‘n paar weke was my oë soos skuurpapier, my liggaam steeds broos na die keiser en my geduld soms nerfdun. En “Slaap wanneer die baba slaap” is die beste grappie oor ouerskap ooit, want wanneer anders moet al die ander huisgoed dan gedoen word?!

In elk geval, nes ek vir nét 15 minute my oë wou toemaak nadat ek uiteindelik vir Klaradyn aan die slaap kon sus, was sy van vooraf wawyd-wakker. Dan begin die volgende siklus met borsvoed, winde uitvryf, doekruil, bietjie speel sonder om haar te oorstimuleer, aan die slaap sus, net om dit alles weer te herhaal …

Ek het myself begin bevraagteken: wat doen ek verkeerd? Maak nie saak hoe hard ek probeer het nie, sy wou geen roetine volg nie. Vergelyking met ander het nie gehelp nie. Beplanning was moeilik en ek was later skoon angstig …

Klaradyn het meer as gereeld wakker geword vir nog en nog en nog melk – toe ek nog geborsvoed het en ook later toe ons oorgeskakel het na ‘n kombinasie van borsvoed en blikmelk. (Ons het soms, nadat sy koeimelk kon drink, selfs met ‘n boksie langlewe-melk en drie doeke op die bedkassie geslaap.) Uiteindelik het ons agter die kap van die byl gekom:

Geen sleep-training metode sou vir ons gewerk het nie, want sy het vergrote mangels gehad. Nes sy diep geslaap het, het sy basies oopmond geslaap. Dit het tot gevolg gehad dat sy dors geword het en dan wakker geword het vir melkies. Nadat Klaradyn se mangels uitgehaal is, was die nagmerries van die gebrek aan slaap verby. Uiteindelik het net soete drome oorgebly.

Hier is ‘n paar riglyne gebaseer op ons ervaring:

– Vertrou jou instink en moenie iets afdwing wat nie vir jou en jou gesin werk nie.

– Maak stadige veranderinge om verbetering te monitor.

– Maak beurte in die aand (as die kinders dit toelaat) om slaap “in te haal” en net weer tot verhaal te kom.

– Al is jou baba nie ‘n goeie slaper nie, kry “cues” vir slaaptyd. Ons speel byvoorbeeld steeds Hillsongs se Lullabies net voor slaaptyd en dit werk goed teen slaaptyd.

– Stel verdere (mediese) ondersoek in as niks help of werk nie. In ons geval was mangels ons Achilles heel.

En onthou: kinders verskil … Met Nina-Maria was ons gelukkig – sy was van die begin af ‘n beter slaper, en juis hierin lê baie genade:

Die ouers bly dieselfde ouers. Dis die babas en hulle slaappatrone wat verskil … Mag julle uiteindelik julle slaapritme en -patroon vind.

Wat is of was julle slaap-uitdagings en hoe probeer of het julle dit oorkom?

#ouerskapsonderoordeel #inspirasiestasie #slaaptydstories #klaasvakie

Deel die artikel

Deel op
Deel op

Lewer Kommentaar

Nuusbriewe